આગમનની આતુરતા

#1
આંખ ખોલું તો તું દેખાય,
બંધ કરું તોય તું દેખાય,
સુતા-જાગતા-દરેક કાર્યમાં તારુંજ દ્રશ્ય,
શમણામાં પણ તું, વાસ્તવિકતામાં પણ તું,
દિવસ રાત તારું સ્મરણ કરું છું.
ઘણા-ઘણા-ઘણા સમયથી તારા આગમનની રાહ જોઈ રહ્યો છું ,
પળો, કલાક, દિવસો, મહિના અને વર્ષો વીત્યા,
પણ હજું તું મુઝથી દૂર છો,
વરસાદના છાંટા પડે તો તારી યાદ આવે,
ઠંડો પવન આવે તો તારી યાદ આવે,
ગ્રીષ્મના તાપમાં તારી યાદ આવે,
પુષ્પોની મહેકમાં, પક્ષીઓના કલરવમાં, વાંસળીના સૂરમાં,
પ્રત્યેક ક્ષણમાં તુંહી-તુંહીના રણકાર સંભળાય છે.
તારા વિના હવે મારું મન કશે નથી લાગતું,
તું હમણાં આવીશ , હમણાં આવીશ એવા આભાસ થયા કરે છે!
ટકટકી લગાવીને તારી રાહ જોઈ રહ્યો છું,
જરીક ધૂળ ઉડતી દેખાય તો મને લાગે છે કે, બસ ! તું આવી ગયો !
તારા સ્વાગત માટે મેં આંગણું વાળીને સાફ કર્યું છે,
સુગંધી જળના છટકાંવ કર્યા છે, મોતીના ચોક પૂર્યા છે,
અક્ષતના મંગળો આલેખ્યા છે, ફુલોથી માર્ગ સજાવ્યો છે,
આસોપાલવના તોરણ બંધાવ્યા છે, વાંસના મંડપો રોપ્યા છે,
કેશર, કંકુ, અબીર, ગુલાલ,
મઘમઘતા ધૂપ, ટમટમતા દીવડાઓ તૈયાર કર્યા છે,
હવે તો આવ !
મારો અંતરપટ,મારા નયનો, મારા શ્વાસોશ્વાસ,
તારી આતુરતાથી રાહ જોઈ રહ્યા છે,
મારા દિલમાં એક વિશ્વાસ છે કે,
તું વહેલો મોડો પણ ગમે ત્યારે,
આવીશ તો ખરા જ !

#2
દ્વારે-દ્વારે ભટકી, ત્યારે તારો દ્વાર મળ્યો,
તેને ઉઘાડવાની ચાહ કરી, છતાં તે બંધ રહ્યો.

એવી શું નારાઝગી? 

કે તું દ્વારની પેલે પાર, અને હું આ પાર,
આમ ક્યાં સુધી, ટકટકી નિહાળું વારંવાર?
કયો કર ચૂકવું, કે આ દ્વાર ખુલે,
કઈ યાચના કરું, કે તું મુખડું બતાવે,
કયા લાડ લડાવું, કે વ્હાલથી તારો હાથ મુઝ માથે ફરે?
દિવસોથી વાટ જોઉં છું, આ દ્વાર સામે,

પળ-પળ વિતાવી, માત્ર તારા નામે,
થાકી હારી દ્વારે આવી ઉભી છું,
હવે તો અંતરપટ ખોલો,
પ્રેમથી આવકારી, કઈં તો બોલો...

#3
ક્યાં ગોતું સરનામું તારું?
ક્યાં દિલ ધરવા આવું?
ક્યાં શોધું હું તારો નૂર?
ક્યાં ભેટવા આવું?
ભટક્યો ભવોભવ, પણ તું ન મળ્યો,
શોધ્યો મેં ઘણો, તું ક્યાંય ન જડ્યો.
જ્યાં જ્યાં લાગ્યું તું છે, ત્યાં તું દેખાયો નહીં,
ક્યાં તું બિરાજે છે, કોણ કહેશે મને?
હવે જો તું મળે તો ,

ભવોભવના વિયોગ વિસારી લઉ,
જીગરમાં છુપાવી લઉં,
હૃદયમાં કંડારી લઉં...

#4
પ્રીત પ્રેમની ઝાંઝર પહેરીને,
લોક-લાજની ભાન ભૂલીને,
તને રીઝવવા આવી છું,
તન-મનથી નાચી ગાઈને,
તને પાસે બોલાવવા આવી છું.
ચરણ કમળનું ભાવાલંબન લઇ,
અંતરમનથી નાચીશ હું,
વ્હાલ મિલનની સુરાવલીમાં,
તાલ નાદમાં ઝૂમીશ હું.
સોળે શણગાર સજી ધજીને,
વ્હાલની વેણ ગૂંથી લાવી છું,
ભવનાટકને દુરે કરવા,
બત્રીશ વિધિએ નાટક રાચીશ હું.
હવે તો પધારો પ્રીતમ પ્યારા,
ક્યાં સુધી તડપાવીશ તું?
પ્રેમ પૂજારણ વાટ નિહારે,
કેટલી રાહ જોવડાવીશ તું?

#5

હું તારી મીરા, તું મારા દિલનો શ્યામ,
શ્વાસોશ્વાસમાં રહે, એક તારું નામ,
તનના આ તંબુરાથી, કરી છે પ્રીત,
રિઝાવીને તને, બસ જોતી રહું તારું સ્મિત,
જોગણ કહે કોઈ, કોઈ કહે પાગલ,
તું મળ્યો, પછી મારે ક્યાં જાઉં બીજા આગળ?
વિતરાગી પર રાગ જાગ્યો, એ કેવું આશ્ચર્ય !
ઝંખના બસ એક, જોતી રહું તારું ઐશ્વર્ય,
હૃદયની ઊર્મિઓમાં, સમાયો છે તું,
દિલના ધબકારામાં, છવાયો છે તું,
કરવું છે તારી જોડે, પ્રીતનું સગપણ,
નથી કરવા હવે મારે, બીજા કોઈ ભ્રમણ.
તું મળતો હોય તો, રાણાનું વિષ ગળી જાઉં,
તું મળતો હોય તો, કાંટાઓ પર સુઈ જાઉં,
તું મળતો હોય તો, બધુજ ભૂલી જાઉં,
બસ તુહીં - તુહીંના નાદમાં સમાય જાઉં.
ઘનઘોર આ વનમાં, તું મને તરછોડી ન શકે,
મઝધારમાં મારી નૌકાને, ભૂલી ન શકે,
ખવૈયા બની તારે આવવુંજ પડે,
મુઝને ઘેલી બનાવી, તું એકલી મૂકી ન શકે !
સાદી અનંતનો પ્રેમ કર્યો છે,
પળે પળે તને વ્હાલ કર્યો છે,
હવે તો પધારો, મારા ચિત્તના ચોર,
હજું ન તડપાવો, મારા મનડાના મોર.
એક દ્રશ્ય આપો, તો મળે મારા દિલને ચેન,
નહીં તો આ મીરાનો આતમ રહેશે બેચેન.

#6
હું ચાતક તારા પ્રેમની, તું સ્વાતીની બુંદ,
હું નિર્જલ ફરું, તારી આશમાં,
મારા નયનો સતત શોધે તને, આ વિશાળ આકાશમાં.
તું વરસે તો આ તૃષા છીપે..
ધીરજની હવે વાત નથી,
વાત છે મિલનના આશની,
વર્ષો વિરહમાં વીત્યા,
પણ આવી છે આજે હર્ષની ઘડી..
વર્ષાની પ્રથમ બિંદુ બની આવ,
આ જીવતરની તરસ છુપાવવાને,
બીજી કોઈ આશ નથી,
બસ આવ આ પ્રેમ-તૃષા બુઝાવવાને..